Walther von der Vogelweide

Kranzlied

Nement frowe disen cranz
also sprach ich zeiner wol getanen maget
so zieret ir den tanz
mit den schonen bluomen als irs uffe
traget·
het ich vil edele gesteine
daz muoz uf uwer houbet
ob ir mirs gehoubet·
sent mine truwe daz ich ez meine·

Frowe ir sit so wolgetan
daz ich uch min schappel gerne geben wil
daz aller beste daz ich han·
wizer und roter bluomen weiz ich vil·
die stent so verre in iener heide
da si schone entsprungen
und die cleinen vogele sungen
da suln wir si brechen beide·